Goa News गोवा बोर्ड आता २०२७- २०२८ ला ९ वी ते ११ वी साठी NCERT चा नवा अभ्यासक्रम आणणार

गोवा बोर्ड आता २०२७- २०२८ साठी NCERT चा नवा अभ्यासक्रम आणण्याच्या तयारीत असल्याचे वृत्त मिळाले आहे. केंद्र सरकारच्या राष्ट्रीय शिक्षण धोरणाशी (NEP) सुसंगत अशी इयत्ता आठवीपर्यंतची पाठ्यपुस्तके गोवा बोर्डाने आधीच उपलब्ध केले आहेत. यानंतर आता गोवा बोर्ड राष्ट्रीय शैक्षणिक संशोधन आणि प्रशिक्षण परिषद (NCERT) इयत्ता नववी ते अकरावीसाठीची पाठ्यपुस्तके विकसित करण्याच्या प्रक्रियेत आहे.

ही सर्व पाठ्यपुस्तके पुढील शैक्षणिक वर्ष २०२७-२८ मध्ये उपलब्ध होण्याची शक्यता असल्याने, गोवा माध्यमिक आणि उच्च माध्यमिक शिक्षण मंडळ अंमलबजावणीसाठीच्या योजनेसह आधीच तयार आहे. मंडळाचे अध्यक्ष भागीरथ शेट्ये म्हणाले की, पहिल्या वर्षात इंग्रजी, गणित, भौतिकशास्त्र, रसायनशास्त्र, जीवशास्त्र आणि हिंदी यांसारख्या काही विषयांसाठी नवीन पाठ्यपुस्तके जशीच्या तशी स्वीकारली जातील.

इतिहास आणि भूगोलाची पुस्तके तीच राहणार

टाईम्स ऑफ इंडियाच्या वृत्तानुसार शेट्ये म्हणाले की, सध्या वापरात असलेली इतिहास आणि भूगोलाची पाठ्यपुस्तकेच पुढे चालू ठेवण्याची मंडळाची योजना आहे, कारण गोवा मंडळाने अलीकडेच स्थानिक सामग्रीसह ही पाठ्यपुस्तके अद्ययावत केली आहेत. “२०२६-२७ साठी, आम्ही इयत्ता नववी ते बारावीपर्यंत तीच पाठ्यपुस्तके वापरणे सुरू ठेवू. जेव्हा नवीन एनसीईआरटी पाठ्यपुस्तके येतील, तेव्हा आम्ही इंग्रजी, गणित, विज्ञान यांसारख्या मुख्य विषयांमध्ये ती जशीच्या तशी स्वीकारू शकतो.

हिंदीच्या बाबतीत, पहिल्या वर्षी त्याचा कसा प्रतिसाद मिळतो हे पाहून, स्थानिक गरजेनुसार त्यात सुधारणा करण्याची गरज आहे की नाही याचा निर्णय घेतला जाईल. एकदा त्यांची अंमलबजावणी झाल्यावर, त्यात काही स्थानिक मजकूर समाविष्ट करण्याची गरज आहे की नाही याचा निर्णय घेतला जाईल,” असे शेट्ये म्हणाले.

त्यांनी सांगितले की, हे प्रचलित मानकांनुसार आहे. गोवा बोर्डाने इंग्रजी, गणित, विज्ञान, अर्थशास्त्र, मानसशास्त्र या विषयांसाठी अस्तित्वात असलेली एनसीईआरटीची पाठ्यपुस्तके लागू केली असून, अकाउंटन्सी आणि सेक्रेटरियल प्रॅक्टिस यांसारख्या काही विषयांसाठी केवळ स्थानिक पुस्तके आहेत.

मार्चमध्ये तयार केला आराखडा

मार्चमध्ये, एनसीईआरटीने एनईपी २०२० नुसार नवीन शालेय पाठ्यपुस्तके सादर करण्यासाठी एक सविस्तर आराखडा सादर केला. ही प्रक्रिया शालेय शिक्षणासाठीच्या नवीन राष्ट्रीय अभ्यासक्रम आराखडा, २०२३ वर आधारित आहे, ज्यामध्ये शिक्षणाच्या विविध स्तरांवर विद्यार्थ्यांकडून काय अपेक्षित आहे, हे स्पष्ट केले आहे.

इयत्ता नववीच्या बाबतीत, नवीन पाठ्यपुस्तके तयार करण्याची प्रक्रिया सुरू आहे. शिक्षक आणि इतरांना त्यातील आशयाचे पुनरावलोकन करता यावे, या उद्देशाने अभ्यासक्रमाचा मसुदा एनसीईआरटीच्या अधिकृत वेबसाइटवर उपलब्ध करून देण्यात आला आहे. इयत्ता दहावी आणि अकरावीसाठी सुधारित पुस्तके २०२७-२८ मध्ये आणण्याचे नियोजन आहे.