गोव्यातील नगरपालिकांच्या नव्या प्रभाग रचनेवर शिक्कामोर्तब; ऑफिशिअल गॅझेट’मध्ये अधिसूचना प्रसिद्ध

पणजी : गोव्यातील नगरपालिकांच्या आगामी निवडणुकांच्या पार्श्वभूमीवर राज्य सरकारने बदललेल्या आणि नव्याने करण्यात आलेल्या प्रभाग रचनेवर (Ward Delimitation) अखेर शिक्कामोर्तब केले आहे. याबाबतची अधिकृत अधिसूचना (Notification) सरकारच्या ”ऑफिशिअल गॅझेट’मध्ये प्रसिद्ध करण्यात आली आहे. नवीन सुधारित कायद्यानुसार ही प्रभाग रचना करण्यात आली असून, यामुळे अनेक नगरपालिकांमधील प्रभागांच्या सीमा बदलल्या आहेत, तर काही ठिकाणी प्रभागांची संख्याही पुनर्रचित करण्यात आली आहे.

मुंबई उच्च न्यायालयाच्या गोवा खंडपीठाने ४ जानेवारी २०२७ पर्यंत राज्यातील ११ नगरपालिकांच्या निवडणुका घेण्याचे आदेश राज्य निवडणूक आयोगाला दिले आहेत. या आदेशानंतर निवडणूक आयोगाने आणि नगरविकास खात्याने अत्यंत वेगाने काम करत नवीन प्रभाग रचनेचा मसुदा तयार केला होता, ज्याला आता गॅझेट अधिसूचनेद्वारे कायदेशीर मान्यता मिळाली आहे. २०११ च्या लोकसंख्येचा आधारनवीन रचनेनुसार, प्रभागांची व्याप्ती आता मतदारांच्या संख्येवर नव्हे, तर २०११ च्या जनगणनेतील एकूण लोकसंख्येच्या आधारावर निश्चित करण्यात आली आहे. पूर्वी प्रति प्रभाग २५०० लोकसंख्येचा निकष होता, तो आता ३००० लोकसंख्या असा वाढवण्यात आला आहे. या नव्या समीकरणामुळे मुरगाव सारख्या मोठ्या पालिकेतील प्रभागांची संख्या २५ वरून २१ वर आली आहे, तर इतर पालिकेच्या सीमांमध्ये मोठे फेरबदल झाले आहेत.

हरकती आणि सूचनांसाठी ३० दिवसांची मुदत

गॅझेटमध्ये प्रसिद्ध झालेल्या या प्रभाग रचनेच्या मसुद्यावर नागरिकांना आपल्या हरकती आणि सूचना मांडण्याची संधी देण्यात आली आहे. अधिसूचना प्रसिद्ध झाल्यापासून पुढील ३० दिवसांच्या आत नागरिक आपल्या हरकती लेखी स्वरूपात राज्य निवडणूक आयोगाकडे नोंदवू शकतात. या मुदतीनंतर प्राप्त होणाऱ्या हरकतींचा विचार केला जाणार नाही, असे प्रशासनाने स्पष्ट केले आहे. आरक्षण आणि मतदार यादी पुढील टप्प्यातप्रभाग रचनेचा अंतिम निर्णय झाल्यानंतर पुढील टप्प्यात इतर मागासवर्गीय (OBC), अनुसूचित जाती (SC), अनुसूचित जमाती (ST) आणि महिलांसाठीच्या प्रभाग आरक्षणाची (Ward Reservation) घोषणा केली जाईल. तसेच, विधानसभा मतदारसंघाच्या यादीवरून प्रभागनिहाय मतदार याद्या (Voters’ List) तयार करण्याचे कामही लवकरच हाती घेतले जाणार आहे. ही मतदार यादी निवडणुकीच्या ३० दिवस आधी नागरिकांना तपासणीसाठी खुली केली जाईल.

प्रभागांचा सविस्तर नकाशा आणि सीमांची माहिती नागरिकांना संबंधित पालिकेच्या कार्यालयात किंवा राज्य निवडणूक आयोगाच्या अधिकृत संकेतस्थळावर पाहता येईल, असे अधिसूचनेत नमूद करण्यात आले आहे.