लक्ष्मी मित्तल यांच्या युक्रेनमधील स्टील प्लांटवर रशियाचा क्षेपणास्त्र हल्ला; 2 ठार, 14 कामगार जखमी

युक्रेन : भारतीय वंशाचे उद्योगपती लक्ष्मी मित्तल यांच्या मालकीच्या युक्रेनमधील क्रिव्ही रिह येथील आर्सेलरमित्तल खाण आणि धातू प्रकल्पावर रशियाने क्षेपणास्त्र हल्ला केला. युक्रेनकडून रशियावर करण्यात आलेल्या मोठ्या ड्रोन हल्ल्याला प्रत्युत्तर म्हणून हा हल्ला करण्यात आल्याचे सांगण्यात येत आहे. या हल्ल्यात दोन जणांचा मृत्यू झाला असून 14 कामगार जखमी झाले आहेत.

क्रिव्ही रिह येथील हा प्रकल्प युक्रेनमधील सर्वात मोठ्या एकात्मिक स्टील प्रकल्पांपैकी एक आहे. रशियन हल्ल्यात प्रकल्पातील महत्त्वाच्या ऊर्जा पायाभूत सुविधांचे नुकसान झाले. तसेच ब्लास्ट फर्नेसच्या कामकाजावरही परिणाम झाला असून उत्पादनाचा काही भाग तात्पुरता बंद करावा लागला आहे.

युक्रेनचा रशियावर मोठा ड्रोन हल्ला

रशियाने केलेल्या हल्ल्याच्या आधी युक्रेनने रशियातील अनेक भागांवर शेकडो ड्रोन डागले होते. या हल्ल्यात किमान सहा जणांचा मृत्यू झाला. मॉस्कोचे प्रादेशिक गव्हर्नर आंद्रेई व्होरोब्योव्ह यांनी या हल्ल्याचे वर्णन अलीकडच्या काळातील सर्वात मोठ्या ड्रोन हल्ल्यांपैकी एक असे केले.

रशियाच्या संरक्षण मंत्रालयाने दिलेल्या माहितीनुसार, देशभरात रात्रीच्या वेळी 822 ड्रोन रोखण्यात आल्याचा दावा करण्यात आला आहे.

मॉस्को परिसरात एका युक्रेनियन ड्रोनने एका खासगी घराला लक्ष्य केल्याने 83 वर्षीय व्यक्तीचा मृत्यू झाल्याचे व्होरोब्योव्ह यांनी सांगितले. पॉडॉल्स्क शहरातील रशियातील मोठी ऑनलाइन रिटेल कंपनी वाइल्डबेरीजच्या गोदामालाही ड्रोन हल्ल्यामुळे आग लागली.

मॉस्कोजवळ 600 ड्रोन आल्याचा दावा

मॉस्कोचे महापौर सर्गेई सोब्यानिन यांच्या म्हणण्यानुसार, राजधानीच्या दिशेने सुमारे 600 ड्रोन येत असल्याचे आढळले. त्यापैकी जवळपास एक तृतीयांश ड्रोन मॉस्को परिसरात नष्ट करण्यात आल्याचा दावा त्यांनी केला.

दरम्यान, रशियाच्या दक्षिण-पश्चिम भागातील रोस्तोव्ह प्रदेशातील तीन शहरांवरही ड्रोन हल्ला झाला. प्रादेशिक गव्हर्नर युरी स्ल्युसार यांच्या म्हणण्यानुसार, या हल्ल्यात पाच जणांचा मृत्यू झाला. 150 हून अधिक ड्रोनच्या या हल्ल्यात अनेक घरांचे आणि एका रेल्वे स्थानकाचे नुकसान झाले. तसेच जंगलातही आग लागली.

युद्धाचे नवे स्वरूप; लांब पल्ल्याच्या हल्ल्यांत वाढ

युक्रेनने यावर्षी रशियावरील हल्ले अधिक तीव्र केले आहेत. लांब पल्ल्याची क्षेपणास्त्रे आणि मोठ्या संख्येने ड्रोनचा वापर करून रशियातील लष्करी उद्योग आणि ऊर्जा सुविधांना लक्ष्य केले जात आहे.

दुसरीकडे, रशियाकडूनही युक्रेनमधील महत्त्वाच्या पायाभूत सुविधांवर सातत्याने हल्ले केले जात आहेत. दोन्ही देशांमधील आघाडीवरील लढाई मोठ्या प्रमाणात ठप्प असताना शांतता चर्चाही रखडल्या आहेत. त्यामुळे आता दोन्ही बाजूंनी एकमेकांच्या हद्दीत खोलवर लांब पल्ल्याचे हल्ले वाढवले आहेत.

या वाढत्या हवाई हल्ल्यांमुळे युद्धाचा फटका सामान्य नागरिकांनाही मोठ्या प्रमाणावर बसत असून, 2022 मधील युद्धाच्या सुरुवातीच्या महिन्यांनंतर नागरिकांच्या मृत्यूचे प्रमाण पुन्हा वाढल्याचे चित्र आहे.