‘मायक्रॉन’ने बाजारी भांडवलात मेटा-टेस्लाला मागे

एअमेरिकन सेमीकंडक्टर कंपनीच्या एआयच्या चिप मागणीमुळे समभागांमध्ये 18.4 टक्क्यांची वाढ

वृत्तसंस्था, नवी दिल्ली

आर्टिफिशियल इंटेलिजन्स (एआय) इन्फ्रास्ट्रक्चर आणि मेमरी चिप्सच्या जोरदार मागणीमुळे अमेरिकन सेमीकंडक्टर कंपनी मायक्रॉन टेक्नॉलॉजीच्या शेअर्समध्ये ऐतिहासिक तेजी दिसून आली. गुरुवारी झालेल्या ट्रेडिंग सत्रात, मायक्रॉनचे बाजार भांडवल काही काळासाठी जगातील आघाडीच्या टेक कंपन्या मेटा प्लॅटफॉर्म्स आणि टेस्लापेक्षा जास्त झाले. तिमाही अंदाजानंतर (मार्गदर्शन) गुंतवणूकदारांचा आत्मविश्वास वाढल्याने कंपनीचे शेअर्स दिवसभरात 18.4 टक्क्यांनी  वधारले.

बाजार भांडवल जवळपास मेटा-टेस्लाच्या बाजार भांडवलाइतकेच बंद झाले. रॉयटर्सच्या वृत्तानुसार, गुरुवारी रात्री उशिरा झालेल्या ट्रेडिंगमध्ये मायक्रॉन टेक्नॉलॉजीचे शेअर्स 15.8 टक्क्यांनी वधारुन बंद होताना, मायक्रॉनचे बाजार भांडवल 1.37 ट्रिलियन डॉलर्स होते. या तुलनेत, मेटा प्लॅटफॉर्म्सचे बाजार भांडवल 1.38 ट्रिलियन डॉलर्स आणि इलॉन मस्कच्या टेस्ला कंपनीचे बाजार भांडवल 1.41 ट्रिलियन डॉलर्स होते. दिवसभरातील व्यवहारांदरम्यान, तेजीमुळे मायक्रॉनने काही काळासाठी या दोन्ही कंपन्यांना मागे टाकले.

चौथ्या तिमाहीत 50 अब्ज डॉलर्सचा अंदाजित महसूल

मायक्रॉनच्या या ऐतिहासिक तेजीमागे कंपनीचा चौथ्या तिमाहीसाठी (ऑगस्टमध्ये संपणारी तिमाही) असलेला महसुलाचा भक्कम अंदाज आहे. या तिमाहीत कंपनी सुमारे 50 अब्ज डॉलर्सचा महसूल मिळवेल अशी अपेक्षा आहे. हा आकडा वॉल स्ट्रीटच्या 43.2 अब्ज डॉलर्सच्या अंदाजापेक्षा लक्षणीयरीत्या जास्त आहे. हायपरस्केलर्सच्या भांडवली खर्चाबद्दल चिंता कायम असूनही, एआय पायाभूत सुविधांवरील खर्च मजबूत राहील, असा विश्वास या उत्कृष्ट कामगिरीमुळे गुंतवणूकदारांना मिळाला आहे.

मे महिन्यात 1 ट्रिलियन डॉलर्सचा टप्पा ओलांडला

मायक्रॉनने यावर्षी मे महिन्याच्या शेवटच्या आठवड्यात प्रथमच 1 ट्रिलियन डॉलर्सच्या बाजार भांडवलाचा टप्पा ओलांडला. हा आकडा गाठून, कंपनी जगातील निवडक दिग्गज टेक कंपन्यांच्या क्लबमध्ये सामील झाली. कंपनीच्या कमाईच्या अहवालानंतर तिच्या शेअरमध्ये 15 टक्के पेक्षा जास्त वाढ झाली आहे, तर 2026 मध्ये आतापर्यंत शेअरमध्ये तब्बल 32 टक्के वाढ होण्याची शक्यता आहे.

टेक क्षेत्रात अॅपलची भूमिका ही एक संमिश्र प्रवृत्ती

मायक्रॉनच्या जबरदस्त निकालांनंतरही, जागतिक टेक क्षेत्रात संमिश्र स्थिती कायम आहे. हायपरस्केलर्सकडून एआयवर होणारा मोठा खर्च किती काळ टिकेल याबद्दल गुंतवणूकदारांना चिंता आहे. दरम्यान, मेमरी आणि स्टोरेज चिप्सच्या वाढत्या खर्चाची भरपाई करण्यासाठी अॅपलने आपल्या आयपॅड आणि मॅकबुकच्या किमती वाढवण्याची घोषणा केली आहे.

2027 नंतरही चिपच मुख्य भूमिका बजावेल

ब्लूमबर्गच्या एका अहवालानुसार, मायक्रॉनचे मुख्य कार्यकारी अधिकारी संजय मेहरोत्रा यांनी विश्लेषकांशी बोलताना सांगितले की, सध्या मागणीच्या तुलनेत पुरवठा कमी पडत आहे. बाजारातील ही तीव्र टंचाई (तुटवडा) 2027 नंतरही कायम राहण्याची शक्यता आहे. चिपची उपलब्धता केवळ 2028 पासून हळूहळू सुधारेल अशी अपेक्षा आहे.