आंबोली / प्रतिनिधी : आंबोली-नांगरतास गडदूवाडी परिसरात बुधवारी रात्री टस्कर हत्ती थेट शिवशाही बससमोर रस्त्यावर आल्याने प्रवाशांसह वाहनचालकांमध्ये भीतीचे वातावरण निर्माण झाले. शिवशाही बसचे चालक महेश सावंत यांनी प्रसंगावधान राखत बस तातडीने थांबविल्याने संभाव्य अनर्थ टळला.
ही घटना रात्री सुमारे ७.४५ वाजण्याच्या सुमारास घडली. पुण्याकडे जाणारी शिवशाही बस नांगरतास गडदूवाडी परिसरातून जात असताना अचानक एक टस्कर हत्ती रस्त्यावर येऊन उभा राहिला. त्यामुळे चालक, वाहक आणि बसमधील प्रवासी काही काळ घाबरून गेले. मात्र, काही वेळाने हत्तीने जंगलाच्या दिशेने कूच केल्याने सर्वांनी सुटकेचा निःश्वास सोडला. त्यानंतर शिवशाही बस पुण्याच्या दिशेने मार्गस्थ झाली.
दरम्यान, हा टस्कर हत्ती अधूनमधून या रस्त्यावर येत असल्याने या मार्गावरून प्रवास करणाऱ्या वाहनचालकांमध्ये भीतीचे वातावरण आहे. संबंधित विभागाने या टस्कर हत्तीचा तातडीने बंदोबस्त करावा, अशी मागणी वाहनचालकांकडून करण्यात येत आहे.
Source link
