child trafficking कुटुंबासोबत लेखी करार, पळून गेल्यास दुप्पट रक्कम वसूल…राजस्थानमध्ये अल्पवयीन मुलींची तस्करी उघड

अल्पवयीन मुलींची तस्करी करणाऱ्या एका आंतरराज्यीय मानवी तस्करी नेटवर्कचा पर्दाफाश केल्यानंतर, राजस्थानच्या झालावाड जिल्ह्यात शुक्रवारी पाच जणांना अटक करण्यात आली आणि एका संशयिताला ताब्यात घेण्यात आले . दहा मुलींची सुटका करण्यात आली, असे पोलिसांनी सांगितले.

झालावाडचे पोलीस अधीक्षक अमित कुमार यांनी शनिवारी सांगितले की, ही टोळी प्रामुख्याने कांजर समाजातील गरीब कुटुंबांना लक्ष्य करत असे आणि अगदी लहान वयातच मुलींना विकत घेत असे . “मुली सुमारे ११ वर्षांच्या होईपर्यंत त्यांना टोळीच्या ताब्यात ठेवले जात असे, त्यानंतर त्यांना मुंबईसारख्या शहरांमध्ये लाखो रुपयांना वेश्याव्यवसायासाठी विकले जात असे,” असे पोलिसांनी सांगितले.

पोलिस काय म्हणाले?

“सुटका केलेल्या बहुतेक मुली चार ते पाच वर्षांच्या आहेत,” असे कुमार म्हणाले. पीडितांची मुंबई, झालावाड, टोंक आणि बुंदीसह राजस्थानमधील अनेक जिल्हे आणि मध्य प्रदेशातील ग्वाल्हेर येथे वेश्याव्यवसायासाठी तस्करी केली जात असल्याचा आरोप आहे.

झालावाडचे पोलिस अधीक्षक म्हणाले, या टोळीने कर्जाच्या ओझ्याखाली दबलेल्या गरीब कुटुंबांना त्यांच्या मुलींना नोकरी देण्याचे आणि आर्थिक मदत देण्याचे आमिष दाखवून लक्ष्य केले.

तपासात असे उघड झाले की, कुटुंबांसोबत लेखी करार करण्यात आले होते. मिळालेल्या माहितीनुसार, या करारानुसार काही विशिष्ट अटींनुसार कर्ज माफ केले जाईल आणि जर एखादी मुलगी तस्करांच्या ताब्यातून पळून गेली, तर तिच्या कुटुंबीयांना दुप्पट किंवा तिप्पट रक्कम परत करावी लागेल.

पोलिसांनी सांगितले की, मानवी तस्करीतून कमावलेल्या पैशांपैकी बहुतांश रक्कम दलाल स्वतःच्या खिशात घालत, तर त्यातील केवळ एक छोटासा भाग त्यांच्या कुटुंबीयांना मिळत असे. या टोळीने अल्पवयीन मुलींना १८ वर्षांवरील प्रौढ म्हणून भासवण्यासाठी बनावट आधार कार्डांचा वापर केल्याचा आरोप आहे.

सुटका झालेल्या मुली कुठल्या?

सुटका करण्यात आलेल्या मुलींपैकी चार झालावाडच्या, तर उर्वरित राजस्थानमधील टोंक आणि बुंदी जिल्ह्यांतील आहेत, असे कुमार यांनी सांगितले.मानवी तस्करीच्या नेटवर्कबद्दल माहिती मिळाल्यानंतर, पोलिसांनी या रॅकेटवर कारवाई करण्यासाठी आणि पीडितांची सुटका करण्यासाठी तीन अतिरिक्त पथकांसह एक विशेष तपास पथक (एसआयटी) तयार केले.

या टोळीची कथित सूत्रधार म्हणून बुंदी जिल्ह्यातील रहिवासी रामकन्या बाई हिची ओळख पटली असून, ती तस्करीच्या नेटवर्कमध्ये सामील असलेल्या दलालांच्या संपर्कात असल्याचे सांगण्यात येत आहे.

मिळालेल्या माहितीनुसार रामकन्या बाई (53), भीम शंकर कंजर (22), अंकुश कंजर (26), रमेश कंजर (55, सर्व रा. बुंदी जि.), आणि सान्नी कंजर (40, रा. झालावाड) अशी अटक करण्यात आलेल्या आरोपींची नावे आहेत. बुंदी जिल्ह्यातून आणखी एका संशयिताला ताब्यात घेण्यात आले आहे.

इतर तिघे फरार आहेत. त्यांची ओळख कर्नाटकचा मोहम्मद हनीफ (४०), बिहारचा अन्वर शेख (४०) आणि मुंबईचा राजेश दबळे (३७) अशी पटली आहे. पोलीस पथके त्यांचा शोध घेत आहेत, असे कुमार यांनी सांगितले.आरोपींवर अनैतिक वाहतूक (प्रतिबंध) कायदा आणि इतर संबंधित कायद्यांच्या तरतुदींनुसार गुन्हा दाखल करण्यात आला आहे. न्यायालयात हजर केल्यानंतर, अटक केलेल्या आरोपींना पाच दिवसांची पोलीस कोठडी सुनावण्यात आली.