वृत्तसंस्था/ ओका
नैर्त्रुत्य कोलंबियामध्ये बसमधील प्रवाशांना लक्ष्य करून झालेल्या स्फोटात 13 जणांचा मृत्यू झाला. तसेच किमान 38 जण जखमी झाले आहेत. जखमींमध्ये पाच मुलांचा समावेश आहे. काजिबियो नगरपालिका क्षेत्रात पॅनअमेरिकन महामार्गावरून बस जात असताना हा स्फोट झाल्याचे ओका प्रदेशाचे गव्हर्नर ऑक्टाव्हियो गुझमन यांनी सांगितले. या प्रदेशात अमली पदार्थांशी संबंधित हिंसाचार सातत्याने वाढत आहे. देशाच्या लष्करप्रमुखांनी या हल्ल्याचे वर्णन ‘दहशतवादी हल्ला’ असे केले आहे. कोलंबियाचे अध्यक्ष गुस्तावो पेट्रो यांनी या हल्ल्याचा तीव्र शब्दात निषेध केला आहे.
बसमधील स्फोट हे एक ‘दहशतवादी कृत्य’ असून ‘इव्हान मोर्डिस्को’ ही कुख्यात गुन्हेगार टोळी आणि जेमी मार्टिनेझ गट याला जबाबदार असल्याचे कोलंबियन सशस्त्र दलाचे कमांडर जनरल ह्यूगो लोपेझ यांनी पत्रकार परिषदेत सांगितले. हे दोन्ही गट आता बरखास्त झालेल्या कोलंबियाच्या क्रांतिकारी सशस्त्र दलाचे बंडखोर गट आहेत. या गटांनी सरकारसोबत झालेल्या 2016 च्या शांतता कराराचे पालन केले नाही. अनेक आदिवासी लोकांसह निष्पाप नागरिकांना ठार करणारे दहशतवादी, फॅसिस्ट आणि अमली पदार्थांचे तस्कर आहेत. गेल्या काही दिवसांत सार्वजनिक पायाभूत सुविधांना लक्ष्य करून झालेल्या स्फोटांच्या मालिकेतील ही ताजी घटना आहे. गेल्या दोन दिवसांत नैर्त्रुत्य कोलंबियामध्ये किमान 26 हिंसक घटना घडल्या आहेत.
Source link
