क्रिकेट इतिहासात प्रथमच भारत-जपान आमनेसामने; 22 सप्टेंबरला ऐतिहासिक टी-20 सामना

मुंबई : क्रिकेट विश्वात प्रथमच भारत आणि जपानचे पुरुष संघ आमनेसामने येणार आहेत. भारतीय क्रिकेट नियामक मंडळाने (बीसीसीआय) शुक्रवारी, 4 सप्टेंबर रोजी मोठी घोषणा करत भारत आणि जपान यांच्यात ऐतिहासिक टी-20 सामना खेळवण्यात येणार असल्याची माहिती दिली.

22 सप्टेंबर 2026 रोजी हा सामना जपानमधील तोचिगी प्रांतातील सानो इंटरनॅशनल क्रिकेट ग्राउंडवर खेळवला जाणार आहे. भारतीय वेळेनुसार सकाळी 9.30 वाजता सामन्याला सुरुवात होईल. आशियाई क्रीडा स्पर्धेतील भारताच्या मोहिमेला सुरुवात होण्याच्या सहा दिवस आधी हा सामना आयोजित करण्यात आला आहे. भारताचा आशियाई क्रीडा स्पर्धेतील पहिला सामना 28 सप्टेंबर रोजी होणार आहे.

पहिल्यांदाच भारत-जपान क्रिकेट सामना

भारत आणि जपानचे पुरुष क्रिकेट संघ यापूर्वी कधीही आमनेसामने आलेले नाहीत. त्यामुळे 22 सप्टेंबरचा सामना दोन्ही देशांच्या क्रिकेट इतिहासातील महत्त्वाचा टप्पा ठरणार आहे. या सामन्याला ‘सुजुकी कप’ असे नाव देण्यात आले आहे.

बीसीसीआय आणि जपान क्रिकेट असोसिएशनने संयुक्त निवेदनाद्वारे या सामन्याची माहिती दिली आहे.

‘स्पोर्ट 75’ उपक्रमाची सुरुवात

भारत-जपानमधील क्रीडा सहकार्य अधिक मजबूत करण्याच्या उद्देशाने सुरू करण्यात आलेल्या ‘स्पोर्ट 75’ या उपक्रमाची सुरुवातही या सामन्यापासून होणार आहे. दोन्ही देशांमधील क्रीडा क्षेत्रातील सहकार्य तसेच नागरिकांमधील परस्पर संबंध वाढवणे हा या उपक्रमाचा प्रमुख उद्देश आहे.

भारत आणि जपानच्या नेतृत्वामध्ये झालेल्या शिखर बैठकीत क्रीडा क्षेत्रातील सहकार्य वाढवण्याबाबत झालेल्या करारातून ‘स्पोर्ट 75’ या उपक्रमाची संकल्पना पुढे आली आहे.

ऑलिम्पिकच्या पार्श्वभूमीवर महत्त्वाचे पाऊल

भारताने 2036च्या ऑलिम्पिक आणि पॅरालिम्पिक स्पर्धांचे यजमानपद मिळवण्याची इच्छा व्यक्त केली आहे. या पार्श्वभूमीवर भारत-जपानमधील क्रीडा सहकार्याला विशेष महत्त्व प्राप्त झाले आहे. ‘स्पोर्ट 75’च्या माध्यमातून दोन्ही देशांतील क्रीडा संबंध आणखी मजबूत करण्याचा प्रयत्न केला जाणार आहे.

त्यामुळे भारत आणि जपान यांच्यातील हा ऐतिहासिक टी-20 सामना केवळ क्रिकेटपुरता मर्यादित न राहता दोन्ही देशांमधील वाढत्या क्रीडा सहकार्याचे प्रतीक ठरणार आहे.