आता बायोकॉनचा उत्तराधिकारी ठरला

संस्थापक किरण मजूमदार यांच्यानंतर  त्यांच्या भाचीकडे कंपनीची सुत्रे  : मुलाखतीमधून मजुमदार यांची माहिती

वृत्तसंस्था, मुंबई

बायोफार्मास्युटिकल कंपनी बायोकॉनच्या संस्थापक आणि अध्यक्षा, किरण मजूमदार शॉ यांनी कंपनीसाठी उत्तराधिकार योजना जाहीर केली आहे. त्यांनी आपली भाची क्लेअर मजूमदार यांची उत्तराधिकारी म्हणून निवड केली आहे.

फॉर्च्यून इंडियाला दिलेल्या मुलाखतीत त्या म्हणाल्या की, कंपनीच्या विकासाच्या पुढील टप्प्याचे नेतृत्व करण्यासाठी 37 वर्षीय क्लेअर ही सर्वात योग्य व्यक्ती आहे. किरण मजूमदार शॉ यांनी चार दशकांपूर्वी बायोकॉनची स्थापना केली होती. त्यांना स्वत:ची मुले नाहीत, त्यामुळे त्यांना कंपनी सुरक्षित हातात सोपवायची होती. त्या म्हणाल्या की, क्लेअरने स्वत:ला सिद्ध केले आहे की ती एक कंपनी चालवू शकते.

क्लेअर या बिकारा थेरप्युटिक्सच्या संस्थापक आणि सीईओ देखील आहेत. क्लेअर मजुमदार सध्या ‘बिकारा थेरप्युटिक्स“च्या संस्थापक आणि सीईओ आहेत. या कंपनीला बायोकॉनने इनक्यूबेट केले आणि 2024 मध्ये नॅसडॅकवर सूचीबद्ध केले आहे.

बिकाराचे बाजार भांडवल 1.6 अब्ज डॉलर्सपेक्षा जास्त आहे. क्लेअर यांनी एमआयटी आणि स्टॅनफोर्डसारख्या विद्यापीठांमधून पदव्या प्राप्त केल्या आहेत. त्यांनी जीवशास्त्रामध्ये पीएचडी केली आहे. क्लेअर मजुमदार, बायोकॉनच्या संस्थापक आणि अध्यक्षा किरण मजुमदार शॉ यांची भाची आहेत.

कुटुंब आरोग्य क्षेत्रात

किरण मजुमदार यांनी भविष्यातील आव्हानांना सामोरे जाण्यासाठी एक मजबूत कौटुंबिक परिसंस्था तयार केली आहे. क्लेअर यांचे भाऊ एरिक मजुमदार हे कॅलटेक येथे प्राध्यापक आणि एआय तज्ञ आहेत. त्यांचे पती थॉमस रॉबर्ट्स हे मॅसॅच्युसेट्स जनरल हॉस्पिटलमध्ये ऑन्कोलॉजिस्ट आहेत. ही टीम बायोकॉनच्या भविष्यातील विकासात महत्त्वाची भूमिका बजावेल.

कर्ज कमी करण्यावर भर

याशिवाय, कर्ज कमी करण्यावर आणि रचना सुलभ करण्यावर भर दिला जात आहे. सध्या, कंपनीचा 60 टक्के महसूल ‘बायोसिमिलर्स“मधून येतो. तिची 12 उत्पादने आधीच बाजारात आहेत आणि सुमारे 20 उत्पादने उत्पादनाच्या वाटेवर आहेत.

चार दशकांपूर्वी बायोकॉनचा पाया घातला

बायोफार्मास्युटिकल कंपनी बायोकॉनचे प्रमुख संस्थापक आणि अध्यक्ष किरण मजूमदार शॉ आहेत. त्यांनी चार दशकांपूर्वी बायोकॉनचा पाया घातला. जुलैपासून नवीन सीईओ पदभार स्वीकारतील व केवळ मुख्य कंपनीतच नाही, तर समूहाच्या इतर कंपन्यांमध्येही नेतृत्वात बदल झाला आहे. श्रीहास तांबे यांनी बायोकॉन बायोलॉजिक्सचे सीईओ आणि व्यवस्थापकीय संचालक म्हणून पदभार स्वीकारला आहे.