गृहपाठ केला नाही म्हणून मारहाण? विशाखापट्टणममध्ये 6 वर्षीय विद्यार्थ्याचा शाळेतच मृत्यू; सीसीटीव्हीने वाढवले प्रश्न, पहा व्हिडिओ

विशाखापट्टणम : आंध्र प्रदेशातील विशाखापट्टणममध्ये एका शाळेत सहा वर्षीय विद्यार्थ्याच्या मृत्यूने खळबळ उडाली आहे. गृहपाठ पूर्ण केला नसल्याच्या कारणावरून शिक्षकाने मुलाला कथित मारहाण केल्याचा आरोप आहे. त्यानंतर वर्गातच मुलगा बेशुद्ध पडला आणि रुग्णालयात नेण्यापूर्वीच त्याचा मृत्यू झाल्याची माहिती आहे.

मृत विद्यार्थ्याचे नाव प्रणय तेजा असल्याचे सांगण्यात येत आहे. तो वन टाऊन भागातील लिटल गार्डन शाळेत शिकत होता. गुरुवारी परीक्षा असल्याने तो शाळेत गेला होता. मात्र, वर्गात अचानक त्याची प्रकृती बिघडली आणि तो बेशुद्ध पडला.

मारहाणीनंतर मुलगा शिक्षकाच्या मांडीवर कोसळला?

या घटनेनंतर शाळेतील सीसीटीव्ही चित्रण तपासण्यात आले. प्राथमिक तपासात विद्यार्थ्याला शिक्षकाकडून मारहाण झाल्याचे चित्रणात दिसत असल्याचा दावा अधिकाऱ्यांकडून करण्यात आला आहे. मारहाणीनंतर मुलगा शिक्षकाच्या मांडीवर कोसळल्याचेही दिसत असल्याचे सांगण्यात येत आहे. या चित्रणामुळे प्रकरण अधिक गंभीर बनले असून, नेमके काय घडले याचा तपास सुरू आहे.

‘मुलाला कोणताही आजार नव्हता’; कुटुंबीयांचा दावा

प्रणयच्या कुटुंबीयांनी त्याला कोणताही आजार नसल्याचे सांगितले आहे. शाळेत जाण्यापूर्वी तो पूर्णपणे निरोगी होता. त्याला ताप किंवा अन्य कोणतीही आरोग्याची समस्या नव्हती, असा दावा कुटुंबीयांनी केला.

घटनेची माहिती शाळेने तातडीने दिली नाही, असा आरोपही कुटुंबीयांनी केला आहे. स्थानिक स्वयंपाक कर्मचाऱ्यांकडून माहिती मिळाल्यानंतर कुटुंबीयांना घटनेची माहिती झाल्याचे त्यांनी सांगितले.

Heartbreaking traumatic incident from a Visakhapatnam school!

An LKG student, reportedly collapsed and d!ed after allegedly being beaten by his teacher for not completing his homework.

Seems, the kid was already sick & was in terrible fear of punishmenthttps://t.co/C1V6c6FTnH

— Keh Ke Peheno (@coolfunnytshirt) August 21, 2026

रुग्णालयात पोहोचण्यापूर्वीच मृत्यू

घटनेनंतर प्रणयला तातडीने किंग जॉर्ज रुग्णालयात नेण्यात आले. मात्र, डॉक्टरांनी त्याला मृत घोषित केले. रुग्णालयातील कर्मचाऱ्यांनी मुलाचा मृत्यू रुग्णालयात पोहोचण्याच्या सुमारे अर्धा तास आधी झाल्याचे पालकांना सांगितल्याची माहिती आहे.

सरकारने तातडीने चौकशीचे आदेश दिले

घटनेची गंभीर दखल घेत आंध्र प्रदेशच्या शालेय शिक्षण विभागाने चौकशीचे आदेश दिले आहेत. महसूल विभागीय अधिकारी दिलीप चक्रवर्ती यांनी पोलीस अधिकाऱ्यांसह रुग्णालयात जाऊन प्राथमिक तपासाची माहिती घेतली.

या प्रकरणासाठी प्रादेशिक संयुक्त संचालक, जिल्हा शिक्षणाधिकारी आणि महसूल विभागीय अधिकारी यांचा समावेश असलेली तीन सदस्यीय चौकशी समिती स्थापन करण्यात आली आहे.

शिक्षक आणि शाळेवर कारवाई होणार?

पोलिसांनी संबंधित व्यक्तींविरोधात गुन्हा दाखल केला असून, विद्यार्थ्याचा मृतदेह शवविच्छेदनासाठी पाठवण्यात आला आहे. चौकशी समितीचा अहवाल आल्यानंतर शाळा प्रशासन आणि संबंधित शिक्षकांविरोधात पुढील कारवाई केली जाणार आहे.

दरम्यान, विद्यार्थ्यांवर शारीरिक अत्याचाराच्या घटना रोखण्यासाठी सरकारी तसेच खासगी शाळांमध्ये शिक्षकांसाठी जनजागृती आणि संवेदनशीलता कार्यक्रम घेण्याचा निर्णय शिक्षण विभागाने घेतला आहे.

(डिस्क्लेमर: या घटनेतील मारहाणीचे आरोप सध्या प्राथमिक तपास आणि कुटुंबीयांच्या दाव्यांवर आधारित आहेत. विद्यार्थ्याच्या मृत्यूचे नेमके कारण आणि संबंधितांची जबाबदारी चौकशी पूर्ण झाल्यानंतर स्पष्ट होणार आहे.)