Revanth Reddy “हिटलरकडून प्रेरणा घेतली, अतिक्रमणाची हिंमत नाही” एका प्रकल्पाचे कौतुक करताना तेलंगणाच्या मुख्यमंत्र्यांची जीभ घसरली

मी हिटलरकडून प्रेरणा घेऊन हायड्रा दल चालवले त्यामुळे सार्वजनिक जलस्रोतांजवळ कुणी अतिक्रमण करण्याची हिंमत करत नाही अशा शब्दात तेलंगणाचे मुख्यमंत्री रेवंथ रेड्डी यांनी आपल्या एका दलाचे कौतुक केले आहे.

बंगळूरु येथील एका कार्यक्रमात बोलताना रेड्डी यांना हायड्रा प्रकल्प किती यशस्वी झाला आहे, असे विचारण्यात आले. त्यावर उत्तर देताना ते म्हणाले की, आता तलाव आणि जलाशयांवर अतिक्रमण करण्याचे धाडस कोणीही करत नाही.

हायड्रा नेमकं काय आहे?

HYDRAA म्हणजे हैदराबाद आपत्ती प्रतिसाद आणि मालमत्ता संरक्षण संस्था. सरकारी जमिनी, उद्याने आणि तलावांचे संरक्षण करण्यासाठी रेड्डी यांनी जुलै २०२४ मध्ये स्थापन केलेला हा एक विशेष कृती दल आहे. लोकांच्या मनात हा दल प्रामुख्याने अतिक्रमणं पाडण्यासाठीची यंत्रणा म्हणूनच ओळखला जातो.

तलाव आणि जलाशयांवर मोठ्या प्रमाणावर होणारी अतिक्रमणे पाहिल्यानंतर, हजारो निवृत्त लष्करी अधिकाऱ्यांचा समावेश असलेल्या अशा कृती दलाची गरज निर्माण झाली, असे रेड्डी म्हणाले.

हायड्राची गरज का भासली?

बंगळूरु येथील कार्यक्रमात बोलताना मुख्यमंत्री रेड्डी पुढे म्हणाले “गरीब लोक तलाव आणि नाल्यांवर अतिक्रमण करतात हे मी समजू शकतो. आजकाल श्रीमंत लोकसुद्धा त्यांच्या फार्महाऊसमुळे जलस्रोतांवर अतिक्रमण करत आहेत आणि त्यांच्या गटार व्यवस्था त्यांना जोडून घेत आहेत. या सर्व समस्या माझ्या लक्षात आल्या. त्यानंतर मी ‘हायड्रा’ (HYDRAA) नावाचा एक कृती दल स्थापन करण्याचा निर्णय घेतला,” असे ते कार्यक्रमात म्हणाले.

हिटलरचे आवडते नाव

जेव्हा रेड्डी यांनी असा दावा केला की ‘हायड्रा’ (HYDRAA) हा शब्द हिटलरच्या मुख्य पथकापासून प्रेरित आहे, ज्याला ते ‘हायड्रा’ (Hydra) म्हणत, तेव्हा हा वाद निर्माण झाला. ते म्हणाले: “हायड्रा हा शब्द हिटलरचा आवडता शब्द आहे. त्याच्या मुख्य पथकाला ‘हायड्रा’ म्हटले जात असे, जे कोणाचीही हत्या करू शकत होते. म्हणून, मी हिटलरकडून प्रेरणा घेतली आणि त्याचे नाव ‘हायड्रा’ ठेवले.”

रेड्डींचे चुकीचे संदर्भ

दरम्यान हिटलरच्या प्रेरणेचा संदर्भ देताना रेवंथ रेड्डी यांच्याकडून चूक झाली.  त्यांनी संदर्भांची सरमिसळ केली असे दिसते, कारण ऐतिहासिकदृष्ट्या, हिटलरची कुख्यात निमलष्करी आणि सुरक्षा दले एसएस (SS) आणि गेस्टापो (Gestapo) होती, ‘हायड्रा’ नावाची कोणतीही गोष्ट नव्हती. लोकप्रिय संस्कृतीत ‘हायड्रा’ हे नाव मार्व्हल कॉमिक्समधील एका काल्पनिक हुकूमशाही संघटनेशी सर्वात प्रसिद्धपणे जोडलेले आहे.

मोहिमेची तुलना इस्रायलशी

रेड्डी तिथेच थांबले नाहीत. हायड्राच्या कार्यावर प्रकाश टाकताना, त्यांनी त्यांच्या विध्वंस मोहिमांची तुलना इराणसह इतर देशांमध्ये इस्रायलने केलेल्या विध्वंसाशी केली. त्यांनी गाझाचा उल्लेख केला नसला तरी, इस्रायलने तिथे अनेक हल्ले केले आहेत, ज्यामुळे इमारती उद्ध्वस्त झाल्या आहेत आणि नागरिकांच्या जीवनावर परिणाम झाला आहे.