होन्नावरमध्ये डिझेल चोरीचा पर्दाफाश; आंतरजिल्हा चोरट्यांच्या टोळीतील 3 जणांना अटक

होन्नावर : टिप्पर लारीच्या डिझेल टाकीतून सुमारे 140 लिटर डिझेल चोरी केल्याप्रकरणी होन्नावर पोलिसांनी आंतरजिल्हा चोरट्यांच्या टोळीतील 3 जणांना अटक केली आहे. आरोपींकडून चोरीसाठी वापरण्यात आलेले अशोक लेलँड दोस्त वाहन आणि अन्य साहित्य, असा सुमारे 1.50 लाख रुपयांचा मुद्देमाल जप्त करण्यात आला आहे.

होन्नावर तालुक्यातील दापगालमक्की येथील रहिवासी मूसा हसन साब यांच्या टिप्पर लारीच्या डिझेल टाकीतून डिझेल चोरीला गेले होते. चोरी झालेल्या डिझेलची किंमत अंदाजे 14,500 रुपये असल्याचे पोलिसांनी सांगितले.

ही चोरी 28 ऑगस्ट रोजी रात्री 9 ते 29 ऑगस्ट रोजी सकाळी 7 वाजण्याच्या दरम्यान झाल्याचे तक्रारीत नमूद करण्यात आले आहे. याप्रकरणी मूसा हसन साब यांनी 1 सप्टेंबर रोजी होन्नावर पोलीस ठाण्यात तक्रार दाखल केली. त्यानंतर पोलिसांनी गुन्हा दाखल करून तपास सुरू केला.

आरोपींचा शोध घेण्यासाठी पोलिसांनी विशेष पथकाची नियुक्ती केली होती. पथकाला मिळालेल्या खात्रीशीर माहितीच्या आधारे शिवमोग्गा जिल्ह्यातील युनूस शबीर खान (28), महम्मद गौस (38) आणि सय्यद सिकंदर (22) यांना ताब्यात घेऊन चौकशी करण्यात आली. चौकशीत टिप्परमधून डिझेल चोरी केल्याचा प्रकार उघडकीस आला.

पोलिसांनी आरोपींकडून गुन्ह्यात वापरलेले अशोक लेलँड दोस्त वाहन तसेच डिझेल चोरीसाठी वापरण्यात आलेले साहित्य जप्त केले. जप्त मुद्देमालाची एकूण किंमत सुमारे 1.50 लाख रुपये असल्याचे पोलिसांनी सांगितले. अटक करण्यात आलेल्या तिन्ही आरोपींना न्यायालयात हजर केले असता त्यांची न्यायालयीन कोठडीत रवानगी करण्यात आली आहे.

ही कारवाई उत्तर कन्नड जिल्हा पोलीस अधीक्षक दीपन एम. एन., आयपीएस, अतिरिक्त पोलीस अधीक्षक-1 जी. कृष्णमूर्ती, भटकळ उपविभागाचे सहायक पोलीस अधीक्षक रानू गुप्ता आणि होन्नावर पोलीस ठाण्याचे पोलीस निरीक्षक सिद्दरामेश्वर यांच्या मार्गदर्शनाखाली, पीएसआय महांतेश वाल्मीकी यांच्या नेतृत्वाखाली करण्यात आली.

पोलीस कर्मचारी मनोज डी., रवी नाईक, गजानन नाईक, शिवानंद नागरदिन्नी तसेच अंकोला पोलीस ठाण्याचे महम्मद शफी, गिरीश आणि शेखर यांनी कारवाईत सहकार्य केले. या यशस्वी कारवाईबद्दल जिल्हा पोलीस अधीक्षकांनी सहभागी अधिकारी व कर्मचाऱ्यांचे कौतुक केले.