गुलवीर सिंग, हरजिंदर कौर यांना रौप्य

10,000 मीटर शर्यतीत पदक मिळविणारा पहिला भारतीय, मनप्रीत कौर, मुरली श्रीशंकर,पारुल चौधरी  अंतिम फेरीत

वृत्तसंस्था/ ग्लास्गो

2026 च्या राष्ट्रकुल क्रीडा स्पर्धेत भारताच्या गुलवीर सिंगने पुरुषांच्या 10,000 मीटर शर्यतीत ऐतिहासिक रौप्य पदक जिंकले. या प्रकारात पदक जिंकणारा तो पहिलाच भारतीय ठरला. पुरुषांच्या उंचउडी प्रकारात सर्वेश कुशारेने पदक जिंकल्यानंतर, अॅथलेटिक्समधील भारताचे हे दुसरे रौप्य पदक ठरले तर हरजिंदर कौरने महिलांच्या 69 किलो वजनी गटात रौप्यपदक जिंकून वेटलिफ्टिंगमधील देशाची दमदार कामगिरी कायम राखली.

मुसळधार पाऊस आणि ओल्या ट्रॅकमुळे निर्माण झालेल्या कठीण परिस्थितीतही, गुलवीरने सुरुवातीपासूनच आघाडीच्या धावपटूंच्या गटात आपले स्थान टिकवून ठेवले आणि शेवटच्या फेऱ्यांमध्ये वेगवान मुसंडी मारली. या भारतीय धावपटूने 27:49.78 सेकंदांची वेळ नोंदवून रौप्य पदक जिंकले; तो ऑस्ट्रेलियाच्या काय रॉबिन्सनच्या (27:48.93 सेकंदांत सुवर्णपदक) अगदी थोड्या फरकाने मागे राहिला. अमेरिकेत स्कॉट सिमन्स यांच्या मार्गदर्शनाखाली सराव करणाऱ्या गुलवीरने अत्यंत चुरशीच्या शर्यतीत ज्यात केनियाचा डॅनियल एबेन्यो यांसारख्या अनेक आफ्रिकन धावपटूंचा समावेश होता. तो अंतिम टप्प्यात पदकाच्या शर्यतीत आला आणि शेवटच्या क्षणी जोरदार मुसंडी मारत ‘आयल ऑफ मॅन‘च्या डेव्हिड मुल्लार्कीला मागे टाकून रौप्य पदक मिळवले. मुल्लार्कीने 27:50.28 सेकंदांची वेळ नोंदवत कांस्य पदक जिंकले. आशियाई क्रीडा स्पर्धेतील कांस्यपदक विजेत्या गुलवीरच्या या निर्भय कामगिरीमुळे आणि शेवटच्या फेऱ्यांमधील दमदार फिनिशमुळे भारताला पुरुषांच्या 10,000 मीटर शर्यतीत राष्ट्रकुल क्रीडा स्पर्धेतील पहिलेच पदक मिळाले.

हरजिंदरला रौप्य

वेटलिफ्टिंग स्पर्धेत हरजिंदर कौरने महिलांच्या 69 किलो वजनी गटात रौप्यपदक जिंकून वेटलिफ्टिंगमधील देशाची दमदार कामगिरी कायम राखली. 28 वर्षीय हरजिंदरने संयमित खेळ करत ‘स्नॅच‘ प्रकारात 101 किलो आणि ‘क्लीन अँड जर्क‘ प्रकारात 126 किलो वजन उचलले. अशा प्रकारे तिने एकूण 227 किलो वजन उचलून आपली मोहीम पूर्ण केली. हरजिंदरने ‘क्लीन अँड जर्क‘ प्रकाराची सुरुवात 120 किलो वजन यशस्वीपणे उचलून केली आणि त्यानंतर दुसऱ्या प्रयत्नात वजन वाढवून 123 किलो केले. तिने हा प्रयत्न आत्मविश्वासाने पूर्ण केला आणि या क्रीडा प्रकारात कॉमनवेल्थ गेम्सचा नवीन विक्रम प्रस्थापित केला. त्यानंतर, आपल्या अंतिम प्रयत्नात 126 किलो वजन यशस्वीपणे उचलून तिने आपल्या कामगिरीला दिमाखदार शेवट दिला; यामुळे तिची एकूण वजन उचलण्याची क्षमता सुधारली आणि तिने एकूण 227 किलोची नोंद केली.

 पूजा सिंगची निराशाजनक कामगिरी

महिलांच्या उंच उडी  प्रकारात निराशाजनक निकाल पहायला मिळाला. आशियाई विजेती पूजा सिंग 1.82 मीटरची उंची पार करण्यात अपयशी ठरल्यामुळे स्पर्धेतून बाहेर पडली. राष्ट्रकुल क्रीडा स्पर्धेत पदार्पण करणाऱ्या या 19 वर्षीय खेळाडूच्या स्पर्धेदरम्यान मुसळधार पावसामुळे व्यत्यय आला होता, त्यानंतर खेळ पुन्हा सुरू झाला. 1.82 मीटरची उंची गाठण्याच्या तिसऱ्या आणि अंतिम प्रयत्नात पूजाला यश आले नाही आणि त्यामुळे तिची या स्पर्धेतील मोहीम संपुष्टात आली.

भारताचे लक्ष नीरज चोप्रावर

आज 30 जुलै रोजी नीरज चोप्रा भालाफेक पात्रता फेरीत सहभागी होणार आहे. अॅथलेटिक्स, वेटलिफ्टिंग या स्पर्धा सुरू असतानाच, भारत ट्रॅक सायकलिंगमधील आपल्या मोहिमेचीही सुरुवात करणार आहे. तेजस्विन शंकर देखील आपली डेकॅथ्लॉन स्पर्धा सुरू करणार आहे. वेटलिफ्टिंगमधील सर्वाधिक वजनी गटांमध्ये, मार्टिना देवी मैबम महिलांच्या 86 किलो गटात पदकासाठी प्रयत्न करेल, तर लवप्रीत सिंग पुरुषांच्या 110 हून अधिक किलो गटात सहभागी होईल. या राष्ट्रकुल क्रीडा स्पर्धेत ट्रॅक सायकलिंगच्या स्पर्धा सुरू होत असताना, रोनाल्डो सिंग लैतोंजाम आणि डेव्हिड बेकहॅम एल्कातोहचुंगो यांसारखे खेळाडूही मैदानात उतरताना दिसतील.

बॉक्सिंगमध्ये भारताची चार पदके निश्चित

भारताच्या सातव्या दिवसाच्या मोहिमेने जोर पकडला असून अंकुश पांघल, सचिन सिवाच, साक्षी चौधरी आणि अरुंधती चौधरी यांनी आपापल्या वजनी गटांत बॉक्सिंगच्या उपांत्य फेरीत धडक मारत भारतासाठी आणखी चार पदके निश्चित केली. याआधी, अनिमेष कुजूरने पुरुषांच्या 200 मीटर शर्यतीच्या प्राथमिक फेरीत 20.46 सेकंदांची ‘सीझन-बेस्ट‘  वेळ नोंदवली, तर तजिंदरपाल सिंग तूर आणि समरदीप सिंग गिल यांनी शॉट पुटच्या अंतिम फेरीत प्रवेश केला. तसेच, पॅरा-स्विमिंगमध्ये चैतन्य कुलकर्णी आणि सुयश जाधव यांनीही पुढील फेरी गाठली.

बेळगावचा जलतरणपटू स्वस्तिक पाटील पाचव्या स्थानावर

बेळगावच्या स्विमर्स व अॅक्वेरियसचा क्लबचा दिव्यांग खेळाडू व मुतगा गावचा रहिवासी स्वातिक पाटील याने पुरुषांच्या 100 मी. ब्रेस्टस्ट्रोक एसबी 9 या विभागात भारताचे प्रतिनिधीत्व करताना स्वातिक पाटीलने अंतिम शर्यतीत 1.15.82 से. इतक्या वेळेसह पाचवे स्थान मिळविले.