मुंबईतील उल्हासनगर येथे एका महिलेला अत्यंत अमानुषपणे मारहाण करत तिची अर्धनग्न अवस्थेत धिंड काढल्याची धक्कादायक घटना समोर आली आहे. मिळालेल्या माहितीनुसार या घटनेनंतर आतापर्यंत तीन आरोपींना अटक करण्यात आली आहे.
ही घटना उल्हासनगरच्या विठ्ठलवाडी परिसरातून समोर आली आहे. समोर आलेल्या वृत्तानुसार पिडीत महिलेवर अत्यंत निर्घृणपणे हल्ला करण्यात आला. सोशल मीडियावर व्हायरल झालेल्या एका व्हिडिओमध्ये काही महिला एका महिलेला मारहाण करताना दिसत आहे. महिलेचे कपडे काढून तिला अर्धनग्न करण्यात आले, तिचे केस कापण्यात आले आणि चपलांचा हार घालून तिला परिसरातून फिरवण्यात आल्याचा आरोप आहे.
व्हिडिओ व्हायरल
या धक्कादायक घटनेचा व्हिडिओ सोशल मिडीयावर वेगाने व्हायरल झाला आणि परिसरात खळबळ उडाली. त्यानंतर पोलिसांनी तात्काळ तपास सुरू केला आहे.हा संपूर्ण वाद एकाच समाजातील दोन कुटुंबांमध्ये मंदिरात प्रवेशावरून झाल्याची म हिती मिळाली. सुरुवातीला दोन्ही कुटुंबांमध्ये वाद होता, पण तो इतका वाढला की प्रकरणाने असे वळण घेतले. या प्रकरणात दोन्ही पक्षांच्या भूमिकेची चौकशी करत असल्याचे पोलिसांनी सांगितले. सात जणांविरुद्ध एफआयआर दाखल करण्यात आला आहे. या प्रकरणी कारवाई करत पोलिसांनी तीन जणांना अटक केली आहे.
मंदिरात जाण्यापासून रोखले
ठाणे पोलिसांच्या माहितीनुसार, ती महिला आणि आरोपी दोघेही वाघरी समाजाचे असून ही कुटुंबं फुगे विकण्याचं काम करतात. आरोपी हे त्या महिलेचे नातेवाईक असल्याची माहिती समोर आली आहे. मिळालेल्या माहितीनुसार, त्या महिलेने त्यांच्या देवतांबद्दल कथितरित्या अपमानजनक टिप्पणी केली होती. यानंतर पिडीत महिलेला मंदिरात प्रवेश करण्यापासून रोखण्यात आले. उल्हासनगर सेंट्रल पोलीस स्टेशनचे वरिष्ठ निरीक्षक शंकर आवताडे यांनी सांगितले की, दोन्ही कुटुंबांमध्ये यापूर्वीही अनेक वाद झाले आहेत. पोलिसांच्या माहितीनुसार, आरोपींनी यापूर्वी त्या महिलेविरोधात एफआयआर दाखल केला होता.
पोलिसांनी दाखल केला गुन्हा
पोलिसांनी भारतीय दंड संहितेच्या (IPC) अनेक गंभीर कलमांखाली गुन्हा दाखल केला आहे. यामध्ये हेतुपुरस्सर दुखापत करणे, गुन्हेगारी धमकी, बेकायदेशीर जमाव आणि शांतता भंग करणे यांसारख्या कलमांचा समावेश आहे. पोलीस सध्या आरोपांची चौकशी करत असून, वादाचे सत्य जाणून घेण्यासाठी दोन्ही पक्षांची चौकशी करत आहेत. सीसीटीव्ही फुटेजचीही तपासणी केली जात असून, घटनास्थळी उपस्थित असलेल्या लोकांचे जबाब नोंदवले जात आहेत.
Source link
