राष्ट्रीय क्रीडा पुरस्कार 2025 जाहीर; तेजस्विन शंकर, दिव्या देशमुखसह 17 जणांना अर्जुन पुरस्कार, खेलरत्नसाठी एकाही खेळाडूची निवड नाही

नवी दिल्ली : राष्ट्रीय क्रीडा पुरस्कार 2025 ची घोषणा करण्यात आली असून यंदा देशातील सर्वोच्च क्रीडा सन्मान असलेल्या मेजर ध्यानचंद खेलरत्न पुरस्कारासाठी एकाही खेळाडूची निवड करण्यात आलेली नाही. दुसरीकडे, विविध क्रीडा प्रकारांमध्ये उल्लेखनीय कामगिरी करणाऱ्या 17 खेळाडूंची अर्जुन पुरस्कारासाठी निवड करण्यात आली आहे. तसेच एका खेळाडूला अर्जुन पुरस्कार (लाइफटाइम) देण्यात येणार आहे.

केंद्रीय क्रीडा मंत्रालयाने मंगळवारी या पुरस्कारांची घोषणा केली. सर्वोच्च न्यायालयाचे माजी न्यायमूर्ती (निवृत्त) अरुण कुमार मिश्रा यांच्या अध्यक्षतेखालील निवड समितीच्या शिफारशींच्या आधारे सरकारने विविध श्रेणींमध्ये खेळाडू, प्रशिक्षक आणि संस्थांना पुरस्कार देण्याचा निर्णय घेतला आहे.

17 खेळाडूंना अर्जुन पुरस्कार

2025 च्या अर्जुन पुरस्कारासाठी अॅथलेटिक्स, बॅडमिंटन, बॉक्सिंग, बुद्धिबळ, हॉकी, कबड्डी, पॅरा-स्पोर्ट्स, रोइंग आणि शूटिंग अशा विविध क्रीडा प्रकारांतील 17 खेळाडूंची निवड करण्यात आली आहे.

अर्जुन पुरस्कार मिळवणाऱ्या खेळाडूंमध्ये तेजस्विन शंकर, मुहम्मद अजमल व्ही., प्रियंका गोस्वामी, त्रिशा जॉली, पुलेला गायत्री गोपीचंद, नरेंद्र, विदित गुजराती, दिव्या देशमुख, धनुष श्रीकांत, लालरेमसियामी, राजकुमार पाल, सुरजीत, पूजा, रुद्रांश खंडेलवाल, एकता भ्यान, अरविंद सिंह आणि अखिल श्योराण यांचा समावेश आहे.

कोणत्या खेळाडूला कोणत्या खेळासाठी अर्जुन पुरस्कार?

• तेजस्विन शंकर – अॅथलेटिक्स
• मुहम्मद अजमल व्ही. – अॅथलेटिक्स
• प्रियंका गोस्वामी – अॅथलेटिक्स
• त्रिशा जॉली – बॅडमिंटन
• पुलेला गायत्री गोपीचंद – बॅडमिंटन
• नरेंद्र – बॉक्सिंग
• विदित गुजराती – बुद्धिबळ
• दिव्या देशमुख – बुद्धिबळ
• धनुष श्रीकांत – बधिर शूटिंग
• लालरेमसियामी – हॉकी
• राजकुमार पाल – हॉकी
• सुरजीत – कबड्डी
• पूजा – कबड्डी
• रुद्रांश खंडेलवाल – पॅरा-शूटिंग
• एकता भ्यान – पॅरा-अॅथलेटिक्स
• अरविंद सिंह – रोइंग
• अखिल श्योराण – शूटिंग

आय अरुमनायगम यांना लाइफटाइम अर्जुन पुरस्कार

2025 चा अर्जुन पुरस्कार (लाइफटाइम) फुटबॉलपटू आय अरुमनायगम यांना देण्यात आला आहे. क्रीडा क्षेत्रातील दीर्घकाळच्या योगदानासाठी आणि निवृत्तीनंतरही खेळाच्या विकासासाठी योगदान देणाऱ्या खेळाडूंना हा विशेष पुरस्कार दिला जातो.

तीन प्रशिक्षकांना द्रोणाचार्य पुरस्कार

यंदाच्या राष्ट्रीय क्रीडा पुरस्कारांमध्ये तीन प्रशिक्षकांची द्रोणाचार्य पुरस्कारासाठी निवड करण्यात आली आहे. निवड समितीच्या शिफारशींच्या आधारे सरकारने ही निवड केली आहे.

खेलरत्न पुरस्कारासाठी यंदा एकही नाव नाही

दरवर्षी देशातील सर्वोच्च क्रीडा सन्मान म्हणून दिला जाणारा मेजर ध्यानचंद खेलरत्न पुरस्कार यंदा मात्र कोणत्याही खेळाडूला देण्यात येणार नाही. त्यामुळे राष्ट्रीय क्रीडा पुरस्कार 2025 मध्ये खेलरत्न पुरस्कारासाठी एकाही खेळाडूची निवड न होणे हा विशेष चर्चेचा विषय ठरला आहे.

अर्जुन पुरस्कार गेल्या चार वर्षांतील उल्लेखनीय कामगिरी, नेतृत्वगुण, क्रीडाभावना आणि शिस्त यांचा विचार करून खेळाडूंना दिला जातो. यंदाच्या पुरस्कारांमध्ये विविध क्रीडा प्रकारांतील खेळाडूंना संधी मिळाल्याने भारतीय क्रीडा क्षेत्रातील वैविध्यपूर्ण कामगिरीचा गौरव करण्यात आला आहे.