Devendra Fadnavis on Ajit Pawar | अजित पवारांच्या अपघाती मृत्यूचा तपास कुठपर्यंत आला? मुख्यमंत्री देवेंद्र फडणवीसांनी सभागृहात दिली मोठी माहिती

मुंबई: राज्याचे दिवंगत उपमुख्यमंत्री अजित पवार यांच्या दुर्दैवी निधनाला आता जवळपास ५ महिने पूर्ण झाले आहेत. त्यांच्या अकाली जाण्यानंतर राजकीय वर्तुळात आणि जनतेत अनेक तर्क-वितर्क लावले जात होते. या पार्श्वभूमीवर, विधानसभेच्या अंतिम आठवडा प्रस्तावा दरम्यान मुख्यमंत्री देवेंद्र फडणवीस यांनी अजित पवार यांच्या अपघाती मृत्यूच्या सुरू असलेल्या तपासाबाबत अत्यंत महत्त्वाची माहिती सभागृहात दिली आहे. या प्रकरणाचा तपास सध्या सीआयडी आणि एआयबी या दोन वेगवेगळ्या पातळ्यांवर अत्यंत गांभीर्याने सुरू असल्याचे मुख्यमंत्र्यांनी स्पष्ट केले.

दोन वेगवेगळ्या यंत्रणांकडून तपास सुरू; सीबीआयबाबत स्पष्टीकरण
अजित पवार यांच्या संदर्भातील या संपूर्ण घटनेवर बोलताना मुख्यमंत्री देवेंद्र फडणवीस म्हणाले की, दादा आपल्यातून निघून गेले ही अत्यंत वेदनादायी बाब आहे. या प्रकरणाचा तपास सीबीआयकडे का दिला नाही, असा प्रश्न अनेकांकडून विचारला जात आहे. परंतु, विमान किंवा हेलिकॉप्टर अपघाताच्या बाबतीत ‘एआयबी’चा (विमान अपघात तपास ब्युरो) रिपोर्ट अत्यंत कायदेशीर आणि तांत्रिकदृष्ट्या महत्त्वाचा असतो. तो रिपोर्ट आल्याशिवाय पुढील मोठी कारवाई करता येत नाही. दरम्यान, सीआयडीने केलेल्या आतापर्यंतच्या तपासानुसार, हेलिकॉप्टरचे पायलट सुमित कपूर यांच्यावर संशय व्यक्त करण्यात आला होता. त्यानुसार त्यांच्या सर्व बँक खात्यांची कसून चौकशी करण्यात आली, मात्र त्यात अद्याप तरी काहीही संशयास्पद किंवा आक्षेपार्ह आढळून आलेले नाही.

मुख्यमंत्र्यांनी पुढे माहिती दिली की, अपघातग्रस्त हेलिकॉप्टरमधील ‘ब्लॅक बॉक्स’ सुरक्षितपणे मिळवण्यात आला असून त्यातील सर्व माहिती आणि आवश्यक ती कागदपत्रे यशस्वीपणे डाऊनलोड करण्यात आली आहेत. या प्रकरणाचा प्राथमिक अहवाल प्राप्त झाला आहे. सामान्यतः अशा विमान अपघातांच्या अंतिम अहवालासाठी तीन ते चार वर्षांचा कालावधी लागतो, हे वास्तव आहे. मात्र, हे प्रकरण अत्यंत संवेदनशील असल्याने राज्य सरकारने केंद्र सरकारला विशेष विनंती केली आहे. त्यानुसार, दुर्दैवाने दादांच्या पहिल्या पुण्यतिथीपूर्वी हा अंतिम अहवाल समोर यावा, यासाठी प्रयत्न सुरू आहेत. हा अंतिम अहवाल आल्यानंतरच सीआयडी किंवा सीबीआय या यंत्रणांना तपासाचे ठोस धागेदोरे मिळतील.